[547] In edit. 1621, "and speciall graces."
What day in the week is most convenient for that exercise, and what bookes of the Scripturis salbe most profitable to be red, we refer to the judgment of everie particulare Churche, we meane, to the wisdome of the Ministeris and Eldaris.
Becaus that Mariage, the blessed ordinance of God, in this cursed Papistrie hath partlie bene contempned; and partlie hath bene so infirmed, that the personis conjoyned could never be assured of continewance,[550] yf the Bischoppis and Prelattis list to dissolve the same; we have thocht goode to schaw oure judgmentis how such confusioun in tymes cuming may be best avoyded.
[550] In edit. 1621, "assured in conscience."
And first publict inhibitioun must be maid, that na personis under the power and obedience of otheris; suche as sonnes and dochteris, [and] these that be under curatouris, neather men nor wemen, contract Mariage privelie and without knawledge [of their parents, tutors, or curators, under whose power they are for the time:][551] whiche yf thei do, the censure and discipline of the Churche to procead against thame. Yf the sone or dowghter, or other, have thair hearte tweiched with desyre of mariage, thei ar bound to geve that honour to the parentis that thei oppin unto thame thair affectioun, askyng of thame counsall[552] and assistance, how that motioun, which thei judge to be of God, may be performed. Yf the father, friend, or maister, ganestand thair requeast, and have na other caus then the commoun sorte of men have; to wit, lack of guidis, or because thei ar nott so hyght-borne as thai requyre; yit must not the pairteis whose heartis ar tweiched mak ony covenant till farther declaratioun be maid unto the Churche of God. And, thairfoir, efter thei have opened thair myndis to thair parentis, or suche otheris as have charge oure thame, thei must declair it also to the Ministrie, or to the Civile Magistrat, requyring thame to travaill with thair parentis for thair consent, whiche to do thei ar bound. And yf thei, to wit, the Magistrate or Ministeris, fynd no just caus why the mariage requyred may not be fulfilled, then efter sufficient admonitioun to the father, friend, maister, or superiour, that none of thame resist the work of God, the Ministerie or Magistrat may enter in the place of the parent, and by consenting to thair just requeastis may admit thame to mariage: for the work of God aught not to be hyndered by the corrupt affectionis of worldlie men. The work of God we call, when two heartis (without filthynes befoir committit) ar so joyned, that boyth requyre and ar content to live together in that holy band of Matrimonye.