Se apostol þa gebigde to Gode ealne þone eard Asiam, se is geteald to healfan dæle middan-eardes; and awrat ða { 70} feorðan Cristes bóc, seo hrepað swyðost ymbe Cristes godcundnysse. Ða oðre þry godspelleras, Matheus, Marcus, Lucas, awriton æror be Cristes menniscnysse. Þa asprungon gedwolmenn on Godes gelaðunge, and cwædon þæt Crist nære ær he acenned wæs of Marian. Þa bædon ealle þa leod-bisceopas ðone halgan apostol þæt he þa feorðan bóc gesette, and þæra gedwolmanna dyrstignesse adwæscte. Iohannes þa bead ðreora daga fæsten gemænelice; and he æfter ðam fæstene wearð swa miclum mid Godes gaste afylled, þæt he ealle Godes englas, and ealle gesceafta, mid heahlicum mode oferstáh, and mid ðysum wordum þa godspellican gesetnysse ongan, "In principio erat uerbum, et uerbum erat apud Deum, et Deus erat uerbum, et reliqua:" þæt is on Englisc, "On frymðe wæs word, and þæt word wæs mid Gode, and þæt word wæs God; þis wæs on frymðe mid Gode; ealle ðing sind þurh hine geworhte, and nis nan þing buton him gesceapen." And swa forð on ealre þære godspellican gesetnysse, he cydde fela be Cristes godcundnysse, hu he ecelice butan angynne of his Fæder acenned is, and mid him rixað on annysse þæs Halgan Gastes, á butan ende. Feawa he awrat be his menniscnysse, forðan þe þa ðry oðre godspelleras genihtsumlice be þam heora bec setton.
Hit gelamp æt sumum sæle þæt þa deofolgyldan þe þa gýt ungeleaffulle wǽron, gecwædon þæt hi woldon þone apostol to heora hæðenscipe geneadian. Þa cwæð se apostol to ðam hæðengyldum, "Gað ealle endemes to Godes cyrcan, and clypiað ealle to eowerum godum, þæt seo cyrce afealle ðurh heora mihte; ðonne buge ic to eowerum hæðenscipe. Gif ðonne eower godes miht þa halgan cyrcan towurpan ne mæg, ic towurpe eower tempel þurh ðæs Ælmihtigan Godes mihte, and ic tocwyse eower deofolgyld; and bið þonne rihtlic geðuht þæt ge geswycon eoweres gedwyldes, and gelyfon on ðone soðan God, seðe ana is Ælmihtig." Þa hæðengyldan ðisum cwyde geðwærlæhton, and Iohannes mid geswæsum wordum þæt folc tihte, þæt hí ufor eodon fram þam deofles { 72} temple; and mid beorhtre stemne ætforan him eallum clypode, "On Godes naman ahreose þis tempel, mid eallum þam deofolgyldum þe him on eardiað, þæt þeos menigu tocnawe þæt ðis hæðengyld deofles biggeng is." Hwæt ða færlice ahreas þæt tempel grundlunga, mid eallum his anlicnyssum to duste awende. On ðam ylcan dæge wurdon gebigede twelf ðusend hæðenra manna to Cristes geleafan, and mid fulluhte gehalgode.