Postmark, BOURNEMOUTH, 13th November, 1884.
MY DEAR THOMSON,--It's a maist remarkable fac', but nae shüner had I written yon braggin', blawin' letter aboot ma business habits, when bang! that very day, my hoast begude in the aifternune. It is really remaurkable; it's providenshle, I believe. The ink wasnae fair dry, the wards werenae well ooten ma mouth, when bang, I got the lee. The mair ye think o't, Thomson, the less ye'll like the looks o't. Proavidence (I'm no sayin') is all verra weel _in its place_; but if proavidence has nae mainners, wha's to learn't? Proavidence is a fine thing, but hoo would you like proavidence to keep your till for ye? The richt place for proavidence is in the Kirk; it has naething to do wi' private correspondence between twa gentlemen, nor freendly cracks, nor a wee bit word of sculduddery ahint the door, nor, in shoart, wi' ony _hole-and-corner wark_, what I would call. I'm pairfec'ly willin' to meet in wi' Proavidence, I'll be prood to meet in wi' him, when my time's come and I _cannae doe nae_ better; but if he's to come skinking aboot my stairfit, damned, I might as weel be deid for a' the comfort I'll can get in life. Cannae he no be made to understand that it's beneath him? Gosh, if I was in his business, I wouldnae steer my heid for a plain, auld ex-elder that, tak him the way he taks himsel', 's just aboot as honest as he can weel afford, an' but for a wheen auld scandals, near forgotten noo, is a pairfectly respectable and thoroughly decent man. Or if I fashed wi' him ava', it wad be kind o' handsome like; a punnote under his stair door, or a bottle o' auld, blended malt to his bit marnin', as a teshtymonial like you ye ken sae weel aboot, but mair successfu'.
Dear Thomson, have I ony money. If I have, _send it_ for the loard's sake.
[The following to Mr. Henry James, who from about this time began to be a frequent and ever welcome visitor at the Bournemouth home, refers to the essay of R. L. S. called a "Humble Remonstrance," which had just appeared in Longman's Magazine. Mr. James had written holding out the prospect of a continuance of the friendly controversy which had thus been opened up between them on the aims and qualities of fiction.]