Ða sind Godes bearn gecigede, þe hine lufiað swiðor þonne þisne middangeard; and ða sind ða rican bearn gecwedene, ðe heora heortan wyrtruman on ðisum andwerdum life plantiað swiðor þonne on Criste: swylce beoð on þeostru aworpene. Þæt godspel cwyð, "On þa yttran þeostru." Ða yttran þeostru sind þæs lichaman blindnyssa wiðutan. Ða inran þeostru sind þæs modes blindnyssa wiðinnan. Se ðe on ðisum andweardum life is wiðinnan ablend, swa þæt he næfð nan andgit ne hóga embe Godes beboda, he bið þonne eft wiðutan ablend, and ælces leohtes bedæled; forðan ðe he ær his lif aspende butan Godes gemynde. Þa earman forscyldegodan cwylmiað on ecum fyre, and swa-ðeah þæt swearte fyr him nane lihtinge ne deð. Wurmas toslitað heora lichaman mid fyrenum toðum, swa swa Crist on his godspelle cwæð, "Þær næfre heora wyrm ne swylt, ne heora fyr ne bið adwæsced." Þær beoð þonne geferlæhte on anre susle, þa þe on life on mándædum geðeodde wæron, swa þæt þa manslagan togædere ecelice on tintregum cwylmiað; and forlígras mid forligrum, gitseras mid gytserum, sceaðan mid sceaðum, ða forsworenan mid forsworenum, on ðam bradan fire, butan ælcere geendunge forwurðað. Þær bið wóp and toða gebitt, forðan ðe ða eagan tyrað on ðam micclum bryne, and ða teð cwaciað eft on swiðlicum cyle. Gif hwam twynige be ðam gemænelicum æriste, þonne understande he þisne drihtenlican cwyde, Þæt þær bið soð ærist, ðær ðær beoð wepende eagan and cearcigende teð.
Drihten cwæð to þam hundredes ealdre, "Far ðe hám, and getimige ðe swa swa ðu gelyfdest; and his cniht wearð gehæled of ðære tide." Be ðisum is to understandenne hu micclum þam cristenum men his agen geleafa fremige, þonne oðres mannes swa micclum fremode. Witodlice, for ðæs { 134} hundredes ealdres geleafan wearð se bedreda gehæled. Geleafa is ealra mægena fyrmest; buton þam ne mæg nán man Gode lician; and se rihtwisa leofað be his geleafan. Uton gelyfan on þa Halgan Ðrynnysse, and on soðe Annysse, þæt se Ælmihtiga Fæder, and his Sunu, þæt is his wisdom, and se Halga Gast, seðe is heora begra lufu and willa, þæt hí sind þry on hadum and on namum, and án God, on ánre godcundnysse æfre wunigende, butan angynne and ende. Amen.
THE THIRD SUNDAY AFTER THE LORD'S EPIPHANY.