Seo eadige Maria ða geoffrode hire lác Gode mid þam cilde, swa hit on Godes ǽ geset wæs. Hit wæs swa geset on þære ealdan ǽ þurh Godes hæse, þæt ða þe mihton { 140} ðurhteon sceoldon bringan anes geares lamb mid heora cylde, Gode to lace, and ane culfran, oþþe ane turtlan. Gif þonne hwylc wif to ðam unspedig wære þæt heo ðas ðing begytan ne mihte, þonne sceolde heo bringan twegen culfran-briddas, oððe twá turtlan.
Þas læssan lác, þæt sind þa fugelas, þe wæron wannspedigra manna lác, wæron for Criste geoffrode. Se Ælmihtiga Godes Sunu wæs swiðe gemyndig ure neoda on eallum ðingum; na þæt an þæt he wolde mann beon for ús, ðaða he God wæs, ac eac swylce he wolde beon þearfa for us, ðaða he rice wæs: to ðy þæt he us forgeafe dæl on his rice, and mænsumunge on his godcundnysse. Lamb getacnað unscæððinysse and þa maran godnysse; gif we þonne swa earme beoð þæt we ne magon þa maran godnysse Gode offrian, þonne sceole we him bringan twa turtlan, oþþe twegen culfran-briddas, þæt is twyfealdlic onbryrdnes eges and lufe. On twa wisan bið se man onbryrd: ærest he him ondræt helle wíte, and bewepð his synna, syððan he nimð eft lufe to Gode; þonne onginð he to murcnienne, and ðincð him to lang hwænne he beo genumen of ðyses lifes earfoðnyssum, and gebroht to ecere reste.
Lytel wæs an lamb, oððe twa turtlan, Gode to bringenne; ac hé ne sceawað na þæs mannes lac swa swiðe swa hé sceawað his heortan. Nis Gode nan neod ure æhta; ealle ðing sindon his, ægðer ge heofen, ge eorðe, and sǽ, and ealle ða ðing ðe on him wuniað: ac he forgeaf eorðlice ðing mannum to brice, and bebead him þæt hí sceoldon mid þam eorðlicum ðingum hine oncnawan þe hí ær forgeaf, na for his neode, ac for mancynnes neode. Gif ðu oncnæwst ðinne Drihten mid ðinum æhtum, be ðinre mæðe, hit fremeð þe sylfum to ðam ecan life: gif ðu hine forgitst, hit hearmað þe sylfum and na Gode, and þu ðolast ðære ecan mede. God gyrnð þa godnysse ðines modes, and na ðinra æhta. Gif ðu hwæt dest Gode to lofe, mid cystigum mode, þonne geswutelast ðu þa gódnysse þines modes mid þære dæde; gif þu ðonne nan { 142} gód dón nelt, Gode to wurðmynte, ðonne geswutelast ðu mid þære uncyste ðine yfelnysse, and seo yfelnys þe fordeð wið God.
On ðære ealdan ǽ is gehwær gesett, þæt God het gelomlice þas fugelas offrian on his lace, for ðære getacnunge þe hí getacniað. Nis nu nanum men alyfed þæt he healde þa ealdan ǽ lichomlice, ac gehealde gehwa hí gastlice. Culfran sind swiðe unscæððige fugelas, and bilewite, and hí lufiað annysse, and fleoð him floccmælum. Do eac swa se cristena man; beo him únsceaðþig, and bilewite, and lufige annysse, and broðorrædene betwux cristenum mannum; þonne geoffrað he gastlice Gode þa culfran-briddas. Þa turtlan getacniað clænnysse: hí sind swa geworhte, gif hyra oðer oðerne forlyst, þonne ne secð seo cucu næfre hire oðerne gemacan. Gif ðonne se cristena man swa deð for Godes lufon, þonne geoffrað he ða turtlan on þa betstan wisan. Ðas twa fugel-cyn ne singað na, swa swa oðre fugelas, ac hi geomeriað, forðan þe hi getacniað haligra manna geomerunge on ðisum life, swa swa Crist cwæð to his apostolum, "Ge beoð geunrotsode on þisum life, ac eower unrotnys bið awend to ecere blisse." And eft he cwæð, "Eadige beoð þa þe heora synna bewepað, forðan ðe hi beoð gefrefrode."