After a few questions had been asked and answered, James, recollecting his errand, pulled out the bag which he had received from his wife, and, exhibiting it to his new-found acquaintance, remarked--
"I'm just gaun doon by to Sandy Laing's here, to get twa pecks o' meal; and gin ye'll stap at leisure for a wee, I'll gae doon the hill wi' ye, and point oot a' the curiosities o' the place by the gate."
The stranger agreed to this proposal, and James marched off with most ungentlemanly strides to the merchant's, from which he returned in an incredibly short time, with his meal on his back, his hat in his hand, and his body bent forward several degrees beyond its usual perpendicular position.
"Ugh!" said James, as he again came up with the stranger, "I'm clean oot o' breath wi' my hurry; but an auld body's blast's sune blawn, and that's a stiff brae to climb wi' a burden; but mine's no a heavy ane."
"Permit me to carry it a bit till you recover yourself," said the stranger, taking hold of the bag.
"Na, na, sir," said James, laughing. "I'm muckle obliged--greatly obliged, sir; but ye dinna ken the penalty o' carryin a pock o' meal yet. Only look at my back, and think hoo sic a melvyin wad suit on your fine black coat. It wad mak ye look like a miller athegither; and the ladies, whan they saw ye neist, wadna ken that it was just yersel again. But I'll gather wund in a wee; and, i' the meantime, as I promised to gie ye an account o' the curiosities o' the place, I'll just begin wi' the nearest first; and, I assure ye, if onything short o' real richteousness can hallow the dust o' the earth, we noo stand on hallowed ground. This very spot where we noo breathe bears the name o' M'Duff's Hill; and thae auld stumps o' wa's, that ye see lookin oot amang the grass there, are the remains o' what was ance a castle or a palace belangin to the Thanes o' Fife. It wad be a very _unpregnable_ place afore the invention o' gunpowther; for ye'll observe that it has Lindores Loch on the south, the Dog Loch on the wast, the Boistart Loch on the north, and the Childert Loch on the east; and there's nae doot but they wad hae ditches atween, to prevent their enemies frae gettin in upon them by surprise. I could tell ye some fine stories about the sieges and battles that hae happened here; but, as it wad tak owre muckle o' yer time, I shall just mention hoo the lochs cam to get their names. About Lindores Loch I need say naething. A'body kens that it's just ca'ed after the little towny there, that stands on the north side o't. But the Dog Loch's rather a darker subject. It's supposed to hae derived its name frae the purpose it was devoted to. In auld times, ilka great chief had twa or three packs o' hounds, for huntin boars, and deers, and men wi'; and it's believed that the dogs frae the castle were aye driven to that loch to drink, when the chase was done; and the auld anes, that were owre sair bursten to rin again, were thrown into the middle o't, wi' stanes about their necks, to droon. Sae, ye see, frae this circumstance it got the name o' the Dog Loch. The Boistart Loch, again, as ye'll observe, lies atween twa hills; and when the wind blaws frae the east or the wast, it gathers into great gusts i' the glen, and maks the water jaw, and jawp, and foam like a caldron; and for this reason it has been ca'ed Boistart, or Boisterous, Loch. But there's a better story than this connected wi' the name o' the Childert Loch; and I aye like to tell't, on account o' the generosity that it displays, and the honour that it reflects upon oor countrywomen, wha, even in the maist savage times, werena athegither withoot some gliffins o' natural affection. It was the custom, it seems, in thae rude ages, for the leddies to engage in oot-door sports as weel as the men; and a very common amusement hereabout, wi' mothers and nurses o' a' descriptions, was the drawin o' their bairns, in a sort o' boxes or cradles, upon the smooth ice o' the loch. This diverted the women folk, and exercised the little anes, wha were thus prepared for the hardships o' the wild life that they afterwards led. Aweel, ae fine winter afternoon, as ane o' the bairns' maids frae the castle was pu'in a young Macduff, in a braw silver-mounted cradle, upon the loch, and his mother lookin at them frae the hill here--maybe frae the very place where we noo stand--the ice brak, and doon gaed the cradle, bairn and a', to the bottom o' the loch.