Ða twegen fixas getácnodon sealm-sang and ðæra witegena cwydas. An ðæra gecydde and bodode Cristes to-cyme mid sealm-sange, and oðer mid witegunge. Nu sind þa twa gesetnyssa, þæt is sealm-sang and witegung, swylce hí syflinge wæron to ðam fíf berenum hlafum, þæt is, to ðam fíf ǽlicum bocum. Þæt folc, þe ðær gereordode, sǽt úp on ðam gærse. Þæt gærs getacnode flæsclice gewilnunge, swa swa se witega cwæð, "Ælc flæsc is gærs, and þæs flæsces wuldor is swilce wyrta blostm." Nu sceal gehwá, seðe wile sittan æt Godes gereorde, and brucan þære gastlican lare, oftredan þæt gærs and ofsittan, þæt is, þæt he sceal ða flæsclican lustas gewyldan, and his lichaman to Godes þeowdome symle gebígan.
Þær wæron getealde æt ðam gereorde fif ðusend wera; forðon þe ða menn, þe to ðam gastlican gereorde belimpað, sceolon beon werlice geworhte, swa swa se apostol cwæð; he cwæð, "Beoð wacole, and standað on geleafan, and onginnað werlice, and beoð gehyrte." Ðeah gif wifmann bið werlice geworht, and strang to Godes willan, heo bið þonne geteald to ðam werum þe æt Godes mysan sittað. Þusend getel bið fulfremed, and ne astihð nán getel ofer þæt. Mid { 190} þam getele bið getácnod seo fulfremednys ðæra manna ðe gereordiað heora sawla mid Godes láre.
"Se Hælend het þa gegadrian þa láfe, þæt hí losian ne sceoldon; and hí ða gefyldon twelf wilion mid þam bricum." Ða láfe ðæs gereordes, þæt sind ða deopnyssa ðære láre þe worold-men understandan ne magon, þa sceolon ða lareowas gegaderian, þæt hí ne losian, and healdan on heora fætelsum, þæt is, on heora heortan, and habban æfre gearo, to teonne forð þone wisdom and ða lare ægðer ge ðære ealdan ǽ ge ðære niwan. Hí ða gegaderodon twelf wilian fulle mid þam bricum. Þæt twelffealde getel getacnode þa twelf apostolas; forðan þe hí underfengon þa digelnyssa þære láre, ðe þæt læwede folc undergitan ne mihte.
"Þæt folc, ða þe þæt wundor geseah, cwædon be Criste, þæt he wære soð wítega, ðe toweard wæs." Soð hí sædon, sumera ðinga: wítega hé wæs, forðan ðe hé wiste ealle towearde þing, and eac fela ðing wítegode, ðe beoð gefyllede butan twyn. He is witega, and he is ealra witegena witegung, forðan ðe ealle wítegan be him witegodon, and Crist gefylde heora ealra witegunga. Þæt folc geseah ða þæt wundor, and hí ðæs swiðe wundredon. Þæt wundor is awriten, and we hit gehyrdon. Þæt ðe on him heora eagan gedydon, þæt deð ure geleafa on ús. Hí hit gesawon, and we his gelyfað þe hit ne gesawon; and we sind forði beteran getealde, swa swa se Hælend be ús on oðre stowe cwæð, "Eadige beoð þa þe me ne geseoð, and hi hwæðere gelyfað on me, and mine wundra mærsiað."