Þam folce wearð cuð þæt se Hælend arærde lytle ær Lazarum of deaðe, seðe læg stincende feower niht on byrgene: þa comon þa togeanes Criste þe geleaffulle wæron, mid þam wurðmynte, swa we ær cwædon. Comon eac sume ða ungeleaffullan, mid nanum wurðmynte, ac mid micclum graman, swa swa Iohannes se Godspellere cwæð, Þæt "ða heafod-menn þæs folces smeadon betwux him þæt hi woldon ofslean þone Lazarum, þe Crist of deaðe awrehte; forðan ðe manega ðæs folces menn gelyfdon on þone Hælend, þurh ðæs deadan mannes ærist." We wyllað nu fon on þone traht þissere rædinge.
Þa twegen leorning-cnihtas þe Crist sende æfter þam assan, hí getacnodon þa láreowas þe God sende mancynne to lærenne. Twegen hí wæron, for ðære getacnunge þe láreow habban sceal. He sceal habban lare, þæt he mage Godes folc mid wisdome læran to rihtum geleafan, and he sceal mid godum weorcum ðam folce wel bysnian, and swa mid þam twam ðingum, þæt is mid lare and godre bysnunge þæt læwede folc gebige symle to Godes willan.
Se getígeda assa and his fola getacniað twa folc, þæt is Iudeisc and hæðen: Ic cweðe, hæðen, forði þe eal mennisc wæs ða-gyt wunigende on hæðenscipe, buton þam anum { 208} Iudeiscan folce, þe heold þa ealdan ǽ on ðam timan. Hí wæron getígede, forðan ðe eal mancyn wæs mid synnum bebunden, swa swa se witega cwæð, "Anra gehwilc manna is gewriðen mid rapum his synna." Þa sende God his apostolas and heora æftergengan to gebundenum mancynne, and het hí untígan, and to him lædan. Hú untigdon hi ðone assan and þone folan? Hí bodedon ðam folce rihtne geleafan and Godes beboda, and eac mid micclum wundrum heora bodunge getrymdon. Þa abeah þæt folc fram deofles þeowdome to Cristes biggencum, and wæron alysede fram eallum synnum þurh þæt halige fulluht, and to Criste gelædde.
Assa is stunt nyten, and unclæne, and toforan oðrum nytenum ungesceadwis, and byrðen-strang. Swa wæron men, ær Cristes to-cyme, stunte and unclæne, ðaða hí ðeowedon deofolgyldum and mislicum leahtrum, and bugon to þam anlicnyssum þe hi sylfe worhton, and him cwædon to, "Þu eart min God." And swa hwilce byrðene swa him deofol on-besette, þa hí bæron. Ac ðaða Crist com to mancynne, þa awende he ure stuntnysse to geráde, and ure unclænnysse to clænum ðeawum. Se getemeda assa hæfde getacnunge þæs Iudeiscan folces, þe wæs getemed under þære ealdan ǽ. Se wilda fola hæfde getacnunge ealles oðres folces, þe wæs þa-gyt hæðen and ungetemed; ac hí wurdon getemede and geleaffulle þaþa Crist sende his leorning-cnihtas geond ealne middangeard, þus cweðende, "Farað geond ealne middangeard, and lærað ealle ðeoda, and fulliað hí on naman þæs Fæder, and þæs Suna, and þæs Halgan Gastes; and beodað þæt hi healdon ealle ða beboda þe ic eow tæhte."