And it is so that many yeres aftir the decesse of the seide William, Justice, ther were many men lyvyng bothe of olde brethern of oures afore rehersyd, and of other that cowde aborne witnesse in this mater, and that knewe the mynde of the seide William Paston, Justice, that it was his last will, of whiche men many now be deceassed; and no merveill, for it is upon a xliij. yere past sithen the seide William, Justice, deyed. And also the seide Annes that was hys wif lyved more thanne xxx. wynter aftir hir husbonde, and was in singuler trust with her husbonde, and one of his executours, and wele knowen in this cuntre, a woman of vertuos lyvyng and disposicion, and of goode discrecioun and conscience, and knewe hir husbondes mynde and last will as wele as ony lyvyng creature; she witnessed alway that it was hire husbondes last will to have this perpetuall messe, and called on it all the dayes of hir lyfe, and also atte her decesse; and sche seide that [it] was the will of her husbonde that the annuyte schulde go oute of the seide maner of Swaynesthorpe. The seide John Paston decessed wolde have hadde it graunted owte of the seide maner of Cressyngham; and summe of the executours wolde have hadde the seide messe to a contynued but for the terme of iiij^xx. yere, and wolde have made writyng accordyng; but the seide Annes wolde not ther of, but seide alway that it was the last will of hir husbonde to have the messe made perpetuall, and the executours schewid to us that they wolde se the wyll perfourmed; and ther upon the executours, be ther comon assent, lefte a cofre with a grete substaunce of money of the goodes of the seide William, Justice, to be kepte with inne our monastery, and tolde and schewed to us that the seide gode schuld never be departid nor hadde oute of our place till we wer made sure of the seide annuyte. And duryng all that season that the seide cofer with the goodes was with ynne our monastery, it was alway schewid to us that the seide annuyte schulde be mortaysed in perpetuyte, and duryng all that season that the seid cofer was in our place, we hadde money yerly yoven us to pray for his soule to kepe [his obytt][97-1]; and be menys devysed with oute the knowleche of the seide Annes, or of ony of our brethern, all the goode that was in the seide cofre was conveyed oute of our monastery, and after that dede done, ther was no more money yoven us, nowther to kepe the seide obit, ner to pray for the soull of the seide William, as be the seide executours, savyng that the seide Annes, duryng her lyve, yaff us of hir owne cost yerly to remembre the soule, and that that hath be done sythen, hath be don of our owne devocion, and this many zerys ther hath no thing be yoven us, notwithstondyng of our own devocion we have rehersid his name in oure bede rolle every Sonday.