I'ay rapporté en mon histoire de la Nouvelle France ce qui est des deux premiers voyages faits outre mer par le sieur de Poutrincourt. Ici i'ay à écrire ce qui s'est ensuiui és voyages subsequens. Depuis quelques années une succession lui est echeuë a cause de Dame Iehanne de Salazar sa mere, qui est la Baronnie de Sainct Iust en Champagne. Les rivieres de Seine & d'Aulbe rendent le lieu de cette Baronnie autant agreable, que fort & avantageux à la defense. Là au commencement de Février mil six cens dix il fit partie de son equippage, y ayant chargé vn bateau de meubles, viures, & munitions de guerre, voire tellement chargé qu'il n'y restoit que deux doigts de bord hors de l'eau. Cependant la riviere estoit enflée & ne se pouuoit plus tenir en son lict à cause des longues pluies hivernales. Les flots le menaçoient souuent, les perils y estoient presens, mesmement és passages de Nogent, Corbeil, Sainct Clou, Ecorche-veau, & autres où des bateaux perirent à sa veuë, sans qu'il fust aucunement emeu d'apprehension. En fin il parvint à Dieppe, & apres quelque sejour il se mit en mer le 26. dudit mois de Février. Plusieurs en cette ville là benissoient son voyage, & prioient Dieu pour la prosperité d'icelui. La saison estoit rude, & les vents le plus souvent contraires. Mais on peut bien appeller vn [7] voyage heureux, quand en fin on arrive à bon port. [_Forbans, ce sont Pyrates._] Ils ne furent gueres loin qu'ils rencontrerent vers le Casquet vn nauire de Forbans, lesquels voyans ledit Sieur & ses gens bien resolus de se defendre si on les attaquoit, passerent outre. Le 6. de Mars ils rencontrerent vnze navires Flamens, & se saluerent l'vn l'autre de chacun vn coup de canon. Depuis le 8. iusques au 15. il y eut tempéte, durant laquelle vne fois ledit Sieur estant couché à la poupe, fut porté de son lict pardessus la table au lict de son fils. [_Su, c'est Midi._] Ce mauvais temps les fit chercher leur route plus au Su, & virent deux iles des Essores, Corbes, & Flore, là où ils eurent le rafraichissement de quelques Marsoins qu'ils prindrent. Et comme l'on dit que de la guerre vient la paix, Ainsi apres ces tourmentes ils eurent des calmes iusques au iour de Pasques Fleuries plus facheux que les tourmentes: car quoy qu'on soit en repos, il n'y a pourtant sujet de contentement: car les vivres se mangent, & la saison de bien faire se passe: bref vn grand calme est fort mauvais sur la mer. Mais cela n'est point perpetuel: & quelquefois (selon l'inconstance d'Eole) apres le calme suit vn vent favorable, tantost vne tempéte, comme il survint vn peu apres (sçauoir le lendemain de Pasques) laquelle fit faire eau à la soute, qui est le magazin du pain, ou biscuit. [_Peril d'vn charpentier._] Occasion que le Charpentier du navire voulant aller remedier au mal avenu, d'autant qu'en faisant ce qui est de son art il troubloit les prieres publiques qui se faisoient du matin, ledit Sieur lui commanda [8] de besongner par le dehors, là où estant allé il trouva le Gouvernail rompu (chose dangereuse) lequel voulant aller racoutrer, comme il estoit à sa besongne, il tomba de son echaffaut dedans la mer. Et bien vint que le temps s'estoit ammoderé: car autrement c'estoit vn homme perdu. Mais il fut garenti par la diligence des matelots, qui lui tendirent vne corde, par laquelle il se sauva.