6. Et maintenant elle commence à voir Qu'elle estoit bien de mauuais iugement De n'estimer l'amour d'vn tel amant Et voudrait bien mon amy deceuoir, Par les escriptz tout fardez de scauoir Qui pourtant n'est en son esprit croissant Ains emprunté de quelque autheur luissant A faint tresbien vn ennoy[90] sans l'avoir Et toutesfois ses parolles fardeez, Ses pleurs, ses plaincts remplis de fictions. Et ses hautz cris & lamentations Ont tant gaigné que par vous sont gardéez Ses lettres { escriptes} ausquellez vous donnez foy Et si l'aymez & croyez plus que moy.
7. Vous la croyez las trop ie l'apperçoy Et vous doutez de ma ferme constance, O mon seul bien & mon seul esperance, Et ne vous puis ie asseurer de ma foy Vous m'estimez plus legier que le noy,[91] Et si n'auez en moy nul' asseurance, Et soupçonnez mon coeur sans apparence, Vous deffiant à trop grand tort de moy. Vous ignorez l'amour que ie vous porte Vous soupçonnez qu'autre amour me trâsporte, Vous estimez mes parolles du vent, Vous depeignez de cire mon las coeur Vous me pensez femme sans iugement, Et tout sela augmente mon ardeur.
8. Mon amour croist & plus en plus croistra Tant que je viure &[92] tiendray à grandeur, Tant seulement d'auoir part en ce coeur Vers qui en fin mon amour paroistra Sy tres à clair que iamais n'en doutra, { _Pur luy je lutterai contre malheur_}[93] Pour luy ie veux recercher la grandeur, Et feray tant qu'en vray cognoistera, Que ie n'ay bien, heur, ne contentement, Qu'a l'obeyr & servir loyaument. Pour luy iattendz toute bonne fortune, Pour luy ie veux garder sainté & vie Pour luy vertu de suyure i'ay enuie[94] Et sans changer me trouvera tout vne.
9. Pour luy aussi ie jette mainte larme. Premier quand il se fist de ce corps { posses}seur, Duquel alors il n'auoit pas le coeur. Puis me donna vn autre dur alarme Quand il versa de son sang mainte dragme Dont de grief il me vint telle[95] doleur, M'en pensay[96] oster la vie en frayeur De perdre la{ s} le seul rempar qui m'arme. Pour luy depuis iay mesprise l'honneur Ce qui nous peult seul pouruoir de bonheur. Pour luy hazarde grandeur & conscience. Pour luy { tous mes} i'ay quité parentz, & amis, Et tous autres respectz sont apart mis. Brief de vous seul ie cherche l'alliance.