Nicholl Twyford, goldsmyth, Adam Karlyll,[70] groc'. A^{ o}. xij^{ o}. maior. Th' Austyn, m'c'.
[Footnote 70: "Cachehill" _in the Cotton MS._]

[Sidenote: Justes in Smythfeld betwen the erle of Not' and the erle of More and othere.]

This yere, in the moneth of May, weren the justes in Smythfeld betwen the erle of Notyngham and the erle of More, Scott.; also betwen the lord Welles and S^{ r}. David Lyndesey, Scott.; also betwen there Nicholl Bemenere and John Bron, Scott.

William Venor, groc', m'. John Loveye. A^{ o}. xiij^{ mo}. John Walcote, drap'.
In this yere were justes betwen S^{ r}. Piers Courtenay and S^{ r}. William Danyell, Scott. And in this yere John Northampton cam home and posseded his goodes.
Adam Bam, goldsmyth, Th' Vyvent. Anno xiiij^{ mo}. m'. John Fraunceys, goldsmyth.
This yere was scarcete of corn. Neverthelees the seide meire, be good counseill, sente his men over the see with gold into divers contres and broughte home corn, so that the prys was well amendyd.[71]
John Hende, drap', m'. John Schadworth, m'c'. A^{ o}. xv^{ o}. Herry Vaun'e, drap'.
[Sidenote: Edward Dalyngreg' and Baldewyn Radyngton were mad kepers of the citee of London.]
[Sidenote: The remevyng of the court to Yorke.]
whiche John Hende occupied the office of the meire into the morwe after the natyvyte of seynt John baptist, the whiche was put down be the kyng and his counseill at Notyngham, and ordeyned S^{ r}. Edward Dalyngregy, knyght, kepere of the citee; and on the xxij day of Juyll the said Edward was discharged of his office, and S^{ r}. Bawdewyn Radyngton at Wyndesore was mad kepere of the citee of London, and so stod in office into the feste of seynt Symond and Jude; at whiche day, be leve of the kyng, they chosen officers in the Yelde halle of London for the yere folwyng as it folwith. And in this yere the courtes were remeved, and withdrawe fro London to York fro the feste of the nativite of seynt John baptist unto Cristemasse folwynge; and all this disese above seyd was for this cause. In this yere Thomas Arundell erchebysshop of York was thanne chaunceler of Engelond, and Waltham bysshop of Salesbury was thanne tresorer of Engelond; the serwauntes of whiche tresorer arrered a grete debate in Fletestrete ayens men of the towne for an hors loof, for whiche the tresorer pleyned upon the citee to the kyng, and wykkedly enformed the kyng; thorugh whiche enformacion and procurment of the chaunceler, the kyng sesed the fraunchise and the liberte of London into hys hond: and the kyng hadde of London x m^{ l} lib' or he wolde be plesyd.





