“Naethin' that ye wud expeck, but juist some bit differ wi' the new factor aboot leavin' his kirk an' jining the lave o' us in the Auld Kirk. Noo, if it hed been ower a cattle reed ye cud hae understude it, but for a man----”
“Nae mair o' yir havers, Jamie,” broke in Drumsheugh, “and keep yir tongue aff Burnbrae; man, ye gied me a fricht.”
“Weel, weel, ye dinna believe me, but it wes the gude wife hersel' that said it tae me, and she wes terrible cast doon. They 've been a' their merried life in the place, an' weemen tak ill wi' changes when they're gettin' up in years.”
“A' canna believe it, Jamie”--although Drumsheugh was plainly alarmed; “a 'll grant ye that the new factor is little better than a waufie, an' a peetifu' dooncome frae Maister Leslie, but he daurna meddle wi' a man's releegion.
“Bigger men than the factors tried that trade in the auld days, and they didna come oot verra weel. Eh, Jamie, ye ken thae stories better than ony o' us.”
“Some o' them cam oot withoot their heads,” said Jamie, with marked satisfaction.
“Forby that,” continued Drumsheugh, gaining conviction. “What dis the wratch ken aither aboot the Auld Kirk or Free Kirk? if he didna ask me laist month hoo mony P. and O.'s we hed in the glen, meanin' U.P.'s, a'm jidgin'.
“He's an Esculopian (Episcopalian) himsel', if he gaes onywhere, an' it wud be a scannal for the like o' him tae mention the word kirk tae Burnbrae.”
“Ye never ken what a factor 'ill dae,” answered Jamie, whose prejudices were invincible, “but the chances are that it 'ill be mischief, setting the tenant against the landlord and the landlord against the tenant; tyrannising ower the ane till he daurna lift his head, an' pushioning the mind o' the ither till he disna ken a true man when he sees him.”
“Preserve 's!” exclaimed Hillocks, amazed at Jamie's eloquence, for the wrong of Burnbrae had roused our cynic to genuine passion, and his little affectations had melted in the white heat.
“What richt hes ony man to hand ower the families that hev been on his estate afore he wes born tae be harried an' insulted by some domineering upstart of a factor, an' then tae spend the money wrung frae the land by honest fouks amang strangers and foreigners?