Ric' Merlawe, irmong', Herry Rede, armerer. A^{ o}. v^{ to}. maior. John Gedeney, drap'.
[Sidenote: S^{ r}. John Oldcastell was taken in Walys.]
In this yere the generall counseill was ended at Constaunce, and an unyte mad in Holy Chirche; and a pope chosen on seynt Martyn day, be fre eleccion and comowne assent of alle the generall counseill cristen, whiche pope was called Martinus quintus. Also in this yere, on the feste of seynt Lucie the virgyne, the yere of oure lord a m^{ l}ccccxvij, S^{ r}. John Oldcastell lord of Cobbeham was taken in the march of Walys, and brought to Westm', where he was forjugged; and he was drawe thorugh the citee of London, which in his dayes was heed of heretykes and Lollers; and he was hanged be a cheyne of iren, and was brent up the galawes and alle.[101]
Will's Sevenok, groc', John Bryan. A^{ o}. vj^{ to}. maior. Rauf Barton, skynn'.
[Sidenote: The duk of Burgoyn was sclayn.]
The whiche John Bryan, schirreve of London,[102] fell in the water of Thamyse, the whiche was cause of his deth, and dyed on the x day of Octobre; and in his stede John Perneys was chosen for the remenaunt of the yere. Also the same yere the kyng of Engelond with his lordes beseged the citee of Roen,[103] the whiche sege dured half a yere and more; but at the laste, thorugh the grace of God, it was yolden to hym upon the day of seynt Wolstan, alle ayens there will, God wot, for nede compelled them therto for defaute of vitaill; for as it was seid there deyde withinne the town for defaute of vitaille, mo thanne xxx m^{ l} durynge the same sege. Also in the same yere the dolphyn of Fraunce sente after the duke of Burgoyn, to whom, as men seyn, nought fully vij nyght before he was sworn un on Godes body sacred to ben good and trewe for to come and speke with hym be syde Parys, at the town of Monstreux, with certeyn persones undir sauf conduyt; and whanne he cam thedir, notwithstondyng the gret othe that was mad betuen them bothe, nother his sauf conduyt, the viscount of Burbon, as the duke kneled before the dolphyn, smot hym with an ax in the heed; and so that the forseid dolphyn and hise complices falsly and untrewly, and ayens alle manere lawe of armes, morthered the forseid duke and made an ende of hym. Also this same yere frere Randolf, a mayster of dyvynyte, that sumtyme was the quene Johanne confessor, at the excitynge of the forseid quene, be sorcerye and be nygramancie wrought for to astroyd the kyng: but, as God wolde, his falsnesse at the laste was aspyed; wherefore be comown parlement the quene forfetyd here landes.