_Alice._ Jealous, weaga eem! Nay, sell is net wohr--ich ferlong si weesht g’sicht gor nimmy aw gooka.
_Knick._ Coom now--shwetz net sellerwaig--wann ich glawa date os du mainsht wass du sawgsht don date ich mich grawd dode sheesa.
_Alice._ Oh, sell wær awer tzu orrick for wann ’d sell du date’sht don glawb ich so g’wiss ich labe os di shpook mer ivverall noch lawfa date.
_Lor._ Un ich bin sure os du feel leever een selwer nemma date’sht os yusht si shpook. Sawgsht net selwer so, Alice?
_Knick._ Sell is now ’n shmarts maidly! Awer Alice, du seeser hoonich, suppose ich roof aw den owet--wann de olty leit ous ’m waig sin? Was sawgsht?
_Alice._ Nay, net for de gons welt! Wann de olt fraw dich im house finna date don insure ich os ’s widder amohl shtawb gevva date.
_Lor._ Awer Alice, waisht net os de mommy sheer olly owet nous gait tzu era nochber, de olt Wigrimsy? Now wann du (to Knickerbocker) coomsht so about ’m aucht uhr un shmeisht ’a wennich gravel wedder ’s fenshter, ei don consht ferleicht de Alice sana.
_Knick._ Goot for dich--’s shmartsht maidle in der welt! Awer Alice, ich hob now aw my mind uf gamaucht os ich gor nix mæ um de Ripsy geb, un ’s naigsht mohl os ich se aw treff sawg ich era grawd rous os----
_Dame._ [_Without, R. U. E._] Alice! Alice! Shweffle un solpater! Awer ich geb der ’s amohl wann ich dich ferwish!
[_ALICE, LORRENNA and KNICKERBOCKER run to R._]
[_ALICE, LORRENNA and KNICKERBOCKER exit hastily, L. H._]
_Rory._ By jinks, awer seller fraw era tzung runn’d os we ’n enda shwans.
_Vedd._ Un wann se yusht de sound fun era shtimm hara don du’n se derfu shpringa os wann se ’n shpook ous ’m Blowa Barrick wær! Awer wo der dihenker is don der Rip all de weil? [_RIP singing without, L. 2 E._] Awer wann mer fum deifel shwetzt is ar aw olsfort um der waig.
[_Enter RIP VAN WINKLE, L. 2 E. with gun, game bag, &c._]
_Rip._ Rip, Rip, wass is des for ’a bisness? Du bisht nix nootz, un sell is ’n fact. Now bin ich ob g’shtart free don morya for nous in der Blowa Barrick, un hob gadenkt ich kent ’n gooter sock ful hawsa un feggle mit hame bringa, awer d’no is der olt Van Brunt, seller shail-awgich ding aw cooma mit a wennich whiskey, un--well--’s is so--ich hob net goot refusa kenna anes tzu nemma, un d’no hen mer evva noch amohl anes g’nooma, un ivver a weil noch anes, un ich wase by chucks nimmy we uft--any how mer hen maner os yusht so a pawr g’nooma. Un ivver a weil is der Van Brunt so ’a wennich how-cum-you-so warra un d’no hut ar sich onna g’laig’d un is ei g’shlofa, un ich bin grawd nous in der barrick un hob feggle g’sana maner os dri doubled uf amohl. Awer--ich wase net we’s coom’d os ich kæ dam fuggle g’shussa hob. Un now hob ich ob g’shwora. Ich drink kæ whiskey mæ--kæ druppa so long os ich labe--un wann ebber mich froke’d for drinka don sawg ich ’m [_VEDDER comes down, R. and offers cup to him._]